સંસદથી સમૃદ્ધિ…? / પરેશ વ્યાસ

સંસદથી સમૃદ્ધિ…?
पक्ष औ’ प्रतिपक्ष संसद में मुखर हैं
बात इतनी है कि कोई पुल बना है                                                                                                                                            –  दुश्यन्त कुमार

પરેશ રાવલે કહ્યું કે સંસદનાં અનુભવે મારા અભિનયને એનરિચ (સમૃદ્ધ) કર્યો છે. યે બાબુરાવકા સ્ટાઈલ હૈ! અને…. આવતીકાલથી સંસદ શરૂ થાય છે. સંસદમાં પુલ બનાવવાની વાત હોય, બે કાંઠાને જોડવાની વાત હોય તો ય શાસક અને વિપક્ષ કડવાં વાદાકોદ કરતાં હોય છે. યે સંસદકા સ્ટાઇલ હૈ! શિયાળ તાણે સીમ ભણી અને કૂતરાં તાણે ગામ ભણી એવી કહેવત છે. આ કહેવતને લિટરલી લેવી નહીં. પણ કાંઇક એવી જ ખેંચતાણ સંસદમાં ચાલતી રહે છે. આવી અફ્તાતફરીમાં કોઈની ગુણવત્તા શી રીતે સુધરે? અથવા તો ઉત્કૃષ્ટતાને કોઇ શી રીતે પામી શકે? નેતા પરેશ રાવલ શું કરે છે? એની અમને ખબર નથી પણ અભિનેતા પરેશ રાવલ સામાન્ય રીતે કોમેડી કરે છે અથવા તો વિલની કરે છે. સંસદનાં અનુભવે એમને સારા કોમેડિયન બનાવ્યા છે કે કે સારા વિલન? એ તો રામ જાણે પણ ખુદ નરેન્દ્ર મોદીએ ચિંતા જતાવી હતી કે સંસદમાંથી વિનોદવૃત્તિ ગાયબ થઇ ગઈ છે. એટલે સાંસદ પરેશ રાવલની કોમેડી તો ઉત્કૃષ્ટ ન જ થઇ હોય. હેં ને? હા, કદાચ વિલનની ભૂમિકા અદા કરવામાં સંસદે એમને એનરિચ કર્યા હશે! કોઈ પણ વ્યક્તિ કે વસ્તુની, ગુણવત્તા કે મૂલ્યમાં, સુધારો કે ઉન્નતિ થાય, તે સમૃદ્ધ થાય એને એનરિચ થયા, એવું  કહેવાય.  

સંસદમાં સભ્યો શું કરે? એવો સવાલ કોઇ પૂછે તો સાચું કહેજો, પહેલો વિચાર તમને શું આવે? એક જમાનો હતો જ્યારે સંસદમાં રમૂજ થતી. ઇંદિરા ગાંધીની કહેવું કે આપણાં પ્રાઇવેટ એન્ટરપ્રાઇઝ (ખાનગી ઔદ્યોગિક સાહસો) પ્રાઇવેટ વધારે છે અને એન્ટરપ્રાઇઝિંગ ઓછા છે; એમની સટીક સેન્સ ઓફ હ્યુમરનો પરિચય હતો. અટલ બિહારી બાજપાઇ સચોટ વાત આગવી રમૂજ સાથે એ રીતે કહેતા કે વિરોધીઓ વિરોધ ય ન કરી શકે. કોઇકે એમનાં વખાણ કરતા કહ્યું કે તેઓ અટલ છે. તેમણે તરત જવાબ દીધો કે અટલ (સ્થિર) તો હૂં, લેકિન બિહારી (વિહાર કરનાર) ભી હૂં!  સંસદમાં હવે એવું નથી. બધા જ રાજકારણીઓ પોતાની ભૂતકાળની ભવ્ય કામગીરીઓ અને સામેવાળાની ભૂતકાળની ભૂંડી કરતૂતો ગણાવવાની કોશિશ કરે છે. તેઓને સકારાત્મક અને હકારાત્મક ચર્ચામાં ભાગ્યે જ રસ છે. સંસદને કેવી રીતે ન ચાલવા દેવી?- એ કોઈ પણ વિપક્ષનો નિર્ધાર રહ્યો છે. ૨૦૧૪ પહેલાં પણ એવું હતું અને અત્યારે પણ એવું જ છે. પરેશ રાવલનું જે હોય તે પણ સંસદમાં ચર્ચા કરતા રાજકારણીઓ આપણને કોઈ પણ રીતે એનરિચ કરે એવી કોઈ સંભાવના મને દેખાતી નથી. આપણે એમની પાસે એ જ શીખવાનું કે આપણે એમની પાસે કાંઈ શીખવાનું નથી.  

આપણે એનરિચ થવું છે. માત્ર ધનદૌલત જ નહીં, વિચારથી, વાણીવર્તણુંકથી એનરિચ. શું કરવું? કોઈ પણ ઉંમર હોય મિત્રનો કોઈ વિકલ્પ નથી. હમઉમ્ર મિત્ર હોય તો વધારે સારું. તમે કાવ્ય હો તો સંગીત, તમે દ્રોપદી હો તો શ્રીકૃષ્ણ, તમે વીરુ હો તો જય, તમે ઇન્ડિયા હો તો ઇઝરાયલ, લાઈફ એનરિચમેન્ટ માટે મિત્રનું હોવું જરૂરી છે. એવો મિત્ર જેની સાથે તમે તમારી કોઈ પણ વાત શેઅર કરી શકો. તમારો ગમો અણગમો, તમારી ટેવ કુટેવ, તમારા સાહસ દુ:સાહસ સઘળું, વગર હિચકિચાટ, વગર કચકચાટ મજિયારું  કરી શકો. સારા પુસ્તકોની સોબત સરાહનીય છે. ઇન્ટરનેટ માહિતીનો દરિયો છે. એમાંથી મોતી વીણતાં આવડે તો એનરિચ થવાય; બાકી પાણી તો સાવ ખારું જ હોય. લેપટોપ, સ્માર્ટ ફોન કે ટીવી; આપણાં દૈનિક  સ્ક્રીન ટાઈમનું રેશનીંગ જરૂરી છે. નહીંતર અક્કલથી એનરિચની થવાની જગ્યાએ અક્કલનાં ઓથમીર થઇ જવાય. મોટીવેશન સ્પીકર રાશીદ ઓગન્લારુ કહે છે કે “કેટલાંક પોતાની જાતને મહાન બનાવવા મહેનત કરે છે. કેટલાંક એવા છે જે અન્યને મહાનતા મેળવવા મદદ કરે છે. આ બીજા પ્રકારનાં લોકો એવા છે જે દુનિયાને એનરિચ કરે છે.” આપણે અન્યને એનરિચ કરી શકીએ તેમ છીએ. તો પછી એમ કરીએ. તંઇ શું?!!

Leave a comment

Filed under ઘટના, પરેશ વ્યાસ, પ્રકીર્ણ, સમાચાર

પ્રતિસાદ આપો

Fill in your details below or click an icon to log in:

WordPress.com Logo

You are commenting using your WordPress.com account. Log Out / બદલો )

Twitter picture

You are commenting using your Twitter account. Log Out / બદલો )

Facebook photo

You are commenting using your Facebook account. Log Out / બદલો )

Google+ photo

You are commenting using your Google+ account. Log Out / બદલો )

Connecting to %s