હસ્તરેખા વળીશું ? યામિની ગૌરાંગ વ્યાસ

ભાગ્યના અવલંબન વગર કવિ પોતાની આગવી ખૂમારીથી જીવવા માંગે છે.
સહજ યાદ આવે-
 -ચં.ચી.મહેતાની પંક્તીઓ
કેવી  પડી છે  તુજ હસ્તરેખા, જાણે શું લાખે નવ હોય લેખાં
પૈસા પૂછે છે? ધનની ન ખામી, જાણે અહોહો તું કુબેરસ્વામી
અને
ડો.મહેશ રાવલની પંક્તીઓ
હસ્તરેખા પર જરા આધાર રાખી જોઇએ
સાવ નક્કર ભીંત વચ્ચે, દ્વાર રાખી જોઇએ !
 અને અજ્ઞાતની
હસ્તરેખા હવામાં ભળી,
સૂર્યનો આજથી ગજ નહિ.
કોઈથી દોરવાયા હતાં,
નાવ કાણી શઢ નહિ
…ની પ ર વા ક ર્યા વ ગ ર
 ટૂંક  સમયમા પ્રસિધ્ધ થનાર
યામિની ગૌરાંગ વ્યાસના “ફૂલ પર ઝાંકળનાં પત્રો”માંથી  સાભાર

 

પળે પળનો બદલાવ જોયા કરૂં છું ધરા શું? ગગન શું? સિતારા વળી શું?

સમાયું છે જીવન અહીં ઠોકરોમાં ત્યાં કિસ્મત અને હસ્તરેખા વળી શું ?

ખુદાના તરફથી મળે તે સ્વીકારું, કદી એકલી છું કદી કાફલો છે

મળી મહેફીલો તો મેં માણી લીધી છે સવાલો જવાબો સમસ્યા વળી શું?

નથી કોઈ મંઝિલ નથી કોઈ રસ્તો ચરણને મળ્યું છે સતત ચાલવાનું

કદી થાક લાગે તો થોભી જવાનું ઉતારા વિષેના ઉધામા વળી શું?

મને શબ્દ સાથે જ નિસ્બત રહી છે સ્વયં અર્થ એમાંથી ઉપજ્યા કરે છે

અને મૌનને પણ હું સુણ્યા કરું છું અવાજો વળી શું ને પડઘા વળી શું?

જગતના વિવેકોને વ્યહવાર છોડી ઉઘાડા જં મેં દ્વાર રાખી મૂક્યા છે

 ભલે કોઈ અણજાણ આવે અતિથિ પ્રતીક્ષાવળી શું? ટકોરા વળી શું?